ဆီးချိုရောဂါမဖြစ်အောင် ကာကွယ်လို့ရလား
ဆီးချိုအမျိုးအစား ၁ နဲ့ ၂ ဆိုပြီး ရှိပါတယ်။ ဆီးချိုအမျိုးအစား ၁ ဟာ ခန္ဓာကိုယ်ထဲက အင်ဆူလင်ထုတ်လုပ်တဲ့ ဆဲလ်တွေ ပျက်ဆီးသွားတာကြောင့် ဖြစ်ပြီး အမျိုးအစား ၂ ကတော့ အင်ဆူလင်ထုတ်တဲ့ဆဲလ်တွေကနေ လုံလောက်အောင် မထုတ်လုပ်နိုင်တာ သို့မဟုတ် ခန္ဓာကိုယ်ဆဲလ်တွေက အင်ဆူလင်ကို တုန့်ပြန်မှု မရှိတာကြောင့် ဖြစ်တာပါ။
အမျိုးအစား ၁ ဆီးချိုမဖြစ်အောင် ကြိုတင်ကာကွယ်လို့ မရပေမယ့် အမျိုးအစား ၂ ဆီးချိုကိုတော့ ကြိုတင်ကာကွယ်လို့ ရပါတယ်။
- အဝလွန်တဲ့သူတွေ
- သွေးထဲမှာ ကိုလက်စထရောများသူတွေ
- ဆီးချိုမျိုးရိုး ရှိသူတွေမှာ အမျိုးအစား ၂ ဆီးချို ဖြစ်နိုင်ခြေ ပိုများတဲ့အတွက် မိမိမှာ အထက်ပါအချက်တွေထဲက တစ်ခု သို့မဟုတ် တစ်ခုထက်ပိုရှိနေသူဆိုရင် ဆီးချိုရောဂါ မဖြစ်အောင် ကာကွယ်ဖို့သင့်ပါပြီ။
ဆီးချိုမဖြစ်အောင် ကာကွယ်ဖို့ ဘာတွေ လုပ်ရမလဲ?
(1) ဝိတ်ချပါ
အရေးအကြီးဆုံးက ဝနေရင် ဝိတ်ချဖို့ပါပဲ။ ဝမှလှတာလို့ ဘယ်လိုပဲပြောပြော ဝတာဟာ မလိုလားအပ်တဲ့အဆီတွေ စုနေတာဖြစ်ပြီး ဆီးချိုသာမက နှလုံးနဲ့ သွေးတိုးရောဂါတွေကိုလည်း ဖိတ်ခေါ်နေတာပါ။ ဒါကြောင့် ဆီးချိုမဖြစ်အောင် ကာကွယ်ဖို့ဆိုရင် ဝိတ်ချဖို့ လိုအပ်ပါတယ်။
သုတေသနတွေအရ အဝလွန်သူတွေမှာ ကိုယ်အလေးချိန်ရဲ့ ၇% ဝိတ်ကျသွားတဲ့အခါ ဆီးချိုဖြစ်နိုင်ခြေကို ၆၀% အထိ လျှော့ချပေးနိုင်တယ်လို့ ဆိုပါတယ်။ ဝိတ်ချတဲ့နေရာမှာ ပိန်ဆေးတွေသောက်တာမျိုး အန္တရာယ်ရှိတဲ့ ဝိတ်ချနည်းမျိုးမဟုတ်ဘဲ လေ့ကျင့်ခန်းလုပ်တာ၊ ကျန်းမာရေးနဲ့ညီတဲ့ အစားအသောက်တွေ စားတာမျိုးကိုသာ ရွေးချယ်သင့်ပါတယ်။
(2) လှုပ်လှုပ်ရှားရှားနေပါ
ကိုယ်လက်လှုပ်ရှား လေ့ကျင့်ခန်းတွေက ကိုယ်အလေးချိန်ကျစေသလို သွေးဖိအားနဲ့ သွေးတွင်းသကြားဓာတ်ကိုလည်း ပုံမှန်ဖြစ်အောင် ထိန်းညှိပေးပါတယ်။ တစ်နေ့ကို နာရီဝက်ခန့်နဲ့ တစ်ပတ်ကို အနည်းဆုံး မိနစ် ၁၅၀ ခန့် ကိုယ်လက်လှုပ်ရှား လေ့ကျင့်ခန်း လုပ်ပါ။
စက်ဘီးစီးတာ၊ ကြက်တောင်ရိုက်တာ၊ တောင်တက်တာ၊ ပြေးတာ စသဖြင့် ကိုယ်ဝါသနာပါရာ အားကစားလုပ်လည်း ရပါတယ်။ ကွန်ပြူတာရှေ့မှာ ထိုင်ပြီးအလုပ်လုပ်ရသူဆို နာရီဝက်တစ်ခါလောက် မတ်တပ်ရပ်အကြောဆန့်တာ၊ ဟိုဟိုဒီဒီ ခဏလျှောက်တာမျိုးလည်း လုပ်ပေးပါ။
(3) ကျန်းမာရေးနဲ့ညီတဲ့ အဆီတွေများများစားပါ
ခန္ဓာကိုယ်အတွက် အဆီဓာတ်ကလည်း လိုပါတယ်။ သံလွင်ဆီ၊ နေကြာဆီ၊ ကန်နိုလာဆီ၊ နေကြာစေ့၊ ဖရုံစေ့၊ ဗာဒံစေ့၊ မြေပဲ၊ Flexseeds၊ ဆယ်လ်မွန်ငါး၊ တူနာငါး၊ ငါးသလောက်တွေမှာ Unsaturated Fats လို့ခေါ်တဲ့ ခန္ဓာကိုယ်ကို အကျိုးပြုတဲ့ မပြည့်ဝဆီတွေ ကြွယ်ဝလို့ များများစားသင့်ပါတယ်။ တိရိစ္ဆာန်အဆီတွေ၊ နို့နဲ့ နို့ထွက်ပစ္စည်းက အဆီတွေကို (ဥပမာ…အဆီပြည့်နွားနို့၊ အဆီပြည့် ဒိန်ချဥ်) ရှောင်ရပါမယ်။
(4) ဟင်းသီးဟင်းရွက် များများစားပါ
အမျှင်ဓာတ်များတဲ့ အသီးအရွက်တွေဟာ ဝိတ်ကျစေသလို သွေးတွင်းသကြားဓာတ်ကိုလည်း ကျစေပါတယ်။ ခရမ်းချဥ်သီး၊ ငရုတ်ပွ၊ အစိမ်းရောင်အရွက်တွေ၊ ပန်းဂေါ်ဖီ၊ ဘရိုကိုလီ၊ ပဲနီလေးနဲ့ ပဲအမျိုးမျိုး စတာတွေက များများစားသင့်တာတွေပါ။ အချိုများတဲ့ အစားအစာတွေ၊ ဆားများတဲ့ အစားအစာတွေ၊ ဆီကြော်တွေ၊ ရယ်ဒီမိတ်အစားအစာတွေ ရှောင်ပါ။
(5) ရေရှည်လုပ်နိုင်မယ့် စားသောက်မှုပုံစံကို ရွေးချယ်ပါ
အခုခေတ်စားနေတဲ့ Keto Diet တို့၊ Fasting တို့က ဝိတ်ချဖို့အတွက် ကောင်းတဲ့အရာတွေပါ။ ဒါပေမယ့် ရေရှည်လုပ်ဖို့အတွက်တော့ အဆင်မပြေပါဘူး။ ဆီးချိုကို ကာကွယ်ဖို့ဆိုရင် ရေရှည် (တစ်သက်လုံး) လုပ်နိုင်မယ့် စားသောက်မှုပုံစံ ဖြစ်ဖို့ အရေးကြီးပါတယ်။
ထမင်းပန်းကန်ရဲ့ တစ်ဝက်ကို ဟင်းသီးဟင်းရွက်၊ လေးပုံတစ်ပုံကို အသား သို့မဟုတ် ပဲနဲ့ ကျန်လေးပုံတစ်ပုံကို ထမင်း သို့မဟုတ် ကစီဓာတ်ပါတဲ့ အစားအစာ စားတာမျိုးကို အကျင့်လုပ်သင့်ပါတယ်။
အခုပြောခဲ့တဲ့ ၅ ချက်ကို ရက်ပိုင်း၊ လပိုင်းမဟုတ်ဘဲ တစ်သက်လုံး စွဲသွားမယ့် အကျင့်လိုမျိုး ဖြစ်တဲ့ထိ လုပ်ရင် ဆီးချိုဆိုတာ ယောင်လို့တောင် အနားကို ကပ်လာနိုင်မှာ မဟုတ်ပါဘူး။ ဆီးချိုရှိပြီးသားသူဆိုရင်လည်း နောက်ဆက်တွဲ ဆိုးကျိုးတွေ (မျက်စိ၊ ကျောက်ကပ်နဲ့ နှလုံးကို ထိခိုက်တာတွေ) မဖြစ်အောင် ကာကွယ်ပေးမှာမို့ အခုပဲ စလိုက်ကြရအောင်နော်။
Healtppy က စာတွေက အတွေးအမြင်ဗဟုသုတ တစ်ခုခု ရခဲ့မယ်ဆိုရင် တခြားသူများလဲ သိအောင် share ပေး၊ mention ပေးခဲ့ကြပါဦး။
ကျန်းမာရေး ပြဿနာများကို Healtppy ၏ အထူးကုဆရာဝန်ကြီးများနှင့်ဆွေးနွေးကုသနိုင်သလို၊ ဆရာဝန်များနှင့် လွယ်ကူလွတ်လပ်စွာ Messenger (သို့မဟုတ်) Phone ကနေလည်း ဆွေးနွေးကုသမှု ရယူနိုင်ပါတယ်။
ဒေါက်တာ ယဉ်ရွှေရည်